Стихи на Казахском языке

Сендік сөз бен суық мұздан жаралған,

Өте алам ба бізді айырған аралдан.

Таңбасы бар, мәні аздау дыбыстар

Құлағыңа жетпес, асып қағаздан.

Жол іздеймін көзсіз арман еліне,

Көрінбейтін, құпия, елес – бір көпір.

Тілегенім тартып мені керіге,

Қиялдарым болғанменен көл-көсір.

Махаббаттың тыншымайтын құлы боп,

Өтсем деймін өзің жүрген жолменен.

Жер бетінде болса бір жан шын сүйген,

Саған адал мәңгілікке мен дер ем.

                                                                                                                   Аударған
                                                                                                                    Шынар МҰСТАПИНА

БЕЙНЕҢДІ СЕНІҢ САЛАМЫН

Құлаған жұлдыз нұрынан

Бейнеңді сенің саламын.

Арманнан биік жаралған

Сырымнан алқа тағамын.

Ғажайып тұнған айнадан

Күлкіңді әсем көремін,

Төгілген көктен әуенмен

Сымбатың түзіп, өремін.

Шапағы күннің нәр берген

Шашыңды бөлем бұрымға,

Бейнелеп түпсіз жанарды,

Көзіңнің батам нұрына.

                                                                                                                  Аударған
                                                                                                                    Шынар МҰСТАПИНА

ӘСЕМ ӘН ТЕРБЕП САХНАНЫ

Әсем ән тербеп сахнаны,

Шу толы зал да биледі.

Көрдім де сен сүйкімдім,

Бәрінен ерек күйге ендім.

Тұрдың сен үнсіз, күлімдеп,

Ырғала билеп әнменен.

Алғашқы актті би билеп,

Әртістер жапты сәнменен.

Солистке кеттің сен еріп,

Қолтаңба алсам екен деп.

Әттең-ай, әртіс болсамшы,

Көңіліңде әнім мекендеп.

Қолыңды алдым жеттім де,

Көңіліңді қалай тапсам деп.

Құрбыңмен сені ерттім де,

Қосылдым қалың топқа кеп.

Қолымда қолың, іштегі өрт

Бойдағы қанды бұлқынтты.

Кеудемнің қалған торында

Махаббат құсы үн қатты.

                                                                                                                Аударған
                                                                                                                    Шынар МҰСТАПИНА